មានសេចក្តីរាយការណ៌ពីប្រជាពលរដ្ឋដែលរស់នៅក្នុងភូមិរំចេក ឃុំរំចេក ស្រុកមេមត់ ខេត្តត្បូងឃ្មុំ បានប្រាប់ឲ្យដឹងថា ពួកគាត់
ជាច្រើនគ្រួសារ ពិតជាមានការមិនសប្បាយចិត្តទៅនឹងអាជ្ញាធររដ្ឋអំណាចរបស់ខ្លួននោះទេ ព្រោះតែសមត្ថកិច្ចអាជ្ញាធរមួយចំនួន
នោះ បានបណ្តែតបណ្តោយឲ្យទីតាំងមូលដ្ឋានដែលពួកគាត់រស់នៅនេះ មានបង្កើតទីតាំងសង្វៀនជល់មាន់ខ្នាតធំមួយ គៀងគរ
មនុស្សឲ្យចូលលេងបែបយ៉ាងសេរីបំផុត គ្មានការអើពើបង្ក្រាបអ្វីសោះតែម្តង ។

សេចក្តីរាយការណ៌នោះបានបន្តថា ទីតាំងចំណុចគីឡូម៉ែត្រ២១ ស្ថិតក្នុងភូមិរំចេក ឃុំរំចេក ស្រុមមេមត់ ខេត្តត្បូងឃ្មុំ កំពុងត្រូវ
បានបុគ្គលដែលមានខ្នងបង្អែកជាអ្នកមានអំណាចនៅពីក្រោយខ្នង បាននឹងកំពុងបង្កើតជាទីតាំងលេងល្បែងពាលាអាវ៉ាសែ ក្នុង នោះមានទាំងបៀរ អាប៉ោង និងជល់មាន់ ដោយមានមនុស្សចូលលេងយ៉ាងគគ្រឹកគគ្រេង ហើយគេល្បីថា អ្នកលេងជល់មាន់គូរ ពិសេសនោះ គឺដើមផាន់ចាប់ពី៥.០០០ដុល្លារឡើងទៅតែម្តង ។

ជារៀងរាល់ថ្ងៃ គេបានឃើញមនុស្សចូលលេងយ៉ាងកងរំពងស្រែកហ៊ោគញ្ជ្រៀវ មើលទៅហាក់បីដូចជាអត់ខ្វល់ខ្វាយភ័យព្រួយ រឿងសមត្ថកិច្ចបង្ក្រាបអ្វីសោះនោះឡើយ ក្នុងនោះមានទាំងម៉ូតូ មានទាំងឡាន ដែលបានបណ្តាក់គ្នាចតតាមព្រៃ និងចូលទៅ
លេងបានយ៉ាងរលូន ចំណែកអស់លោកសមត្ថកិច្ចជាពិសេសនោះ គឺអាជ្ញាធរ ហាក់បីដូចជាមិនខ្វល់ខ្វាយអ្វីសោះតែម្តង ។

ប្រជាពលរដ្ឋជាច្រើនរស់នៅក្នុងឃុំរំចេកបានលើកឡើងថា ករណីនេះ លោក ហុង គឹមហឿន អធិការស្រុកមេមត់ គួរណាស់តែ
ទទួលខុសត្រូវក្នុងការបង្ក្រាបល្បែងខុសច្បាប់ទាំងនេះ តាមអនុសាសន៌បទបញ្ជារបស់លោកឧបនាយករដ្ឋមន្ត្រី ស ខេង ប៉ុន្តែ
ផ្ទុយទៅវិញ ពលរដ្ឋជាច្រើនត្អូញត្អែថា ពួកគាត់បានរាយការណ៌ទៅលោកអធិការរូបនោះជាច្រើនលើកហើយ ប៉ុន្តែករណីរឿង
ទីតាំងល្បែងជល់មាន់ខុសច្បាប់នេះ គឺហាក់បីដូចជាគ្មានសមត្ថកិច្ចណាអើពើនោះឡើយ ។

សម្រាប់ព័ត៌មានខាងលើនេះ ខ្លាប៉ុស្តិ៍មិនអាចសុំការបំភ្លឺពីលោក ប៉ែន រ័ត្ន ស្នងការនគរបាលខេត្តត្បូងឃ្មុំ ក្នុងករណីដែលសមត្ថ កិច្ចមិនបង្ក្រាបទីតាំងល្បែងខុសច្បាប់នេះ នៅឡើយទេក្នុងថ្ងៃនេះ ព្រោះខលអត់ចូល ៕