កំពង់ធំ៖ នៅថ្ងៃទី១៥ ខែកញ្ញា ឆ្នាំ២០២៦ លោក គង់ សំអាត អភិបាលស្រុកប្រាសាទបល្ល័ង្ក និងជាប្រធានគណៈបក្សប្រជាជនកម្ពុជាស្រុកប្រាសាទបល្ល័ង្ក អមដំណើរដោយលោក ជិន ហ៊ីន ប្រធានគណៈបក្សប្រជាជនកម្ពុជាឃុំសាលាវិស័យ ព្រមទាំងសហការី បាននាំយកគ្រឿងឧបភោគបរិភោគ និងថវិកា ដែលជាអំណោយរបស់សម្តេចតេជោ ហ៊ុន សែន ប្រធានគណៈបក្សប្រជាជនកម្ពុជា តាមរយៈអ្នកឧកញ៉ាបណ្ឌិត ទ្រី ភាព ដើម្បីចែកជូនប្រជាពលរដ្ឋដែលមានជីវភាពខ្វះខាត នៅក្នុងឃុំចំនួន២ នៃស្រុកប្រាសាទបល្ល័ង្ក ខេត្តកំពង់ធំ។
ការចែកអំណោយនេះធ្វើឡើងក្នុងគោលបំណងចូលរួមជួយសម្រាលការលំបាក និងជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋដែលជួបប្រទះការខ្វះខាត ព្រមទាំងបង្ហាញពីការយកចិត្តទុកដាក់ចំពោះសុខទុក្ខរបស់ប្រជាពលរដ្ឋនៅមូលដ្ឋាន។
បើតាមការបញ្ជាក់លើបណ្តាយសង្គម បានអោយដឹងថា អំណោយដែលត្រូវបានចែកជូនប្រជាពលរដ្ឋសរុបចំនួន ៥១គ្រួសារ ក្នុងនោះមានប្រជាពលរដ្ឋនៅ ភូមិតាឡែក ឃុំសាលាវិស័យ ចំនួន៣០គ្រួសារ និងប្រជាពលរដ្ឋនៅ ភូមិម្រាក ខ.ចាស់ ឃុំទួលគ្រើល ចំនួន២១គ្រួសារ។
ក្នុងមួយគ្រួសារទទួលបានអង្ករចំនួន ១៥គីឡូក្រាម ទឹកត្រី ទឹកស៊ីអ៊ីវ និងថវិកាចំនួន ២០,០០០រៀល ដើម្បីយកទៅប្រើប្រាស់ និងដោះស្រាយតម្រូវការចាំបាច់ក្នុងជីវភាពប្រចាំថ្ងៃ។
លោក គង់ សំអាត បានលើកឡើងថា ការនាំយកអំណោយមកចែកជូនប្រជាពលរដ្ឋនាពេលនេះ គឺជាការចូលរួមចំណែកដ៏មានអត្ថន័យក្នុងការជួយសម្រាលបន្ទុករបស់គ្រួសារដែលមានជីវភាពខ្វះខាត។ ជាមួយគ្នានេះ លោកក៏បានផ្តាំផ្ញើឱ្យបងប្អូនប្រជាពលរដ្ឋបន្តយកចិត្តទុកដាក់ថែរក្សាសុខភាព ប្រកបរបរចិញ្ចឹមជីវិតដោយស្របច្បាប់ និងចូលរួមសហការជាមួយអាជ្ញាធរមូលដ្ឋាន ដើម្បីរួមគ្នាអភិវឌ្ឍសហគមន៍ឱ្យកាន់តែមានភាពរីកចម្រើន។
ប្រជាពលរដ្ឋដែលទទួលបានអំណោយបានសម្តែងនូវក្តីរីករាយ និងអំណរគុណចំពោះសម្តេចតេជោ ហ៊ុន សែន និងអ្នកឧកញ៉ាបណ្ឌិត ទ្រី ភាព ព្រមទាំងលោកអភិបាលស្រុក និងក្រុមការងារ ដែលបានយកចិត្តទុកដាក់ចំពោះសុខទុក្ខ និងជីវភាពរបស់ពួកគាត់។
សកម្មភាពមនុស្សធម៌នេះ ក៏ជាការបង្ហាញឱ្យឃើញពីស្មារតីចែករំលែក និងការយកចិត្តទុកដាក់ចំពោះប្រជាពលរដ្ឋនៅមូលដ្ឋាន ជាពិសេសគ្រួសារដែលកំពុងជួបការលំបាក ដោយផ្តល់ជំនួយជាក់ស្តែងដើម្បីរួមចំណែកកាត់បន្ថយការខ្វះខាត និងបង្កើនភាពកក់ក្តៅក្នុងសហគមន៍។
ដូចពាក្យចាស់លើកឡើងថា ចែករំលែកថ្ងៃនេះ ជួយសម្រាលទុក្ខលំបាក និងបង្កើតក្តីសង្ឃឹមសម្រាប់ប្រជាពលរដ្ឋ៕