បន្ទាប់ពីទទួលបាននូវការណែនាំ និងចង្អុលបង្ហាញពីសំណាក់នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការរងនគរបាលជាតិ និងដោយមានការយកចិត្តទុកដាក់ខ្ពស់ ពីសំណាក់លោកឧត្តមសេនីយ៏ទោ សួស សុខតារា ស្នងការនគរបាលខេត្ត ព្រះវិហារ នឹងដោយមានការសម្របសម្រួលពីលោក ទី សុវិនថាល់ ព្រះរាជអាជ្ញាអមសាលាដំបូងខេត្តព្រះវិហារផងដែរនោះ ក្រុម ជនសង្ស័យដែលមានបក្សពួកចំនួន២នាក់ ដែលសមត្ថកិច្ចសង្ស័យលួចរថយន្តពីស្រុកឧត្តុង្គខេត្តកំពង់ស្ពី យកមកលាក់ទុកនៅ ក្នុងចំនុចភូមិគ្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ បំរុងយកទៅលក់បន្តរទៀតនោះតែត្រូវអស់លាក់ជាប់អន្ទាក់ប៉ូលិសខេត្តព្រះវិហារ ក្រប៊ូចជាប់ កាលពីវេលាម៉ោងប្រមាណ៧យប់ ថ្ងៃទី១៤ ខែវិច្ចិការ ឆ្នាំ២០១៩ ។

នេះបើតាមការបញ្ជាក់ពីលោកវរះសេនីយ៏ទោ រិទ្ធ សូណា អធិការនគរបាលស្រុកត្បែងមានជ័យ បានឲ្យដឹងថា ជនសង្ស័យទាំង ២នាក់ ដែលសមត្ថកិច្ចធ្វើការឃាត់ខ្លួននោះ មានទី១ឈ្មោះ ផន សុភក្តិ ភេទប្រុសអាយុ២៩ឆ្នាំ មុខរបមិនពិតប្រាកដ និងទី ២ ឈ្មោះ តាយ សុផៃ ភេទប្រុសអាយុ២២ឆ្នាំ មានមុខរបមិនពិតប្រាកដ ជនសង្ស័យទាំង២នាក់ខាងលើបច្ចុប្បន្នស្នាក់នៅភូមិគ្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារជាមួយគ្នា ។

ក្រោយធ្វើការឃាត់ខ្លួនជនសង្ស័យទាំង២នាក់ខាងលើ សមត្ថកិច្ចក៏បានធ្វើការស្រាវជ្រាវរកឃើញ និងដកហូតបានវត្ថុតាំងរួមមាន រថយន្តLexus RX300 ស៊េរីឆ្នាំ២០១៩ ពាក់ស្លាកលេខភ្នំពេញ២.B.G.49.59 មួយគ្រឿងដែលជនសង្ស័យទាំង២នាក់ យកទៅ លាក់ទុកចោលចំងាយពីផ្លូវជាតិប្រហែល៣០០ម៉ែត និងដកហូតម៉ូតូកែឆ្នៃចំនួន១គ្រឿង រួមនឹងសម្ភារ: ប្រើប្រាស់គ្រឿងញៀនមួយចំនួនទៀត ។

បច្ចុប្បន្នជនសង្ស័យ រួមនឹងវត្ថុតាងដកហូតបានខាងលើ ត្រូវបានបញ្ជូនទៅកាន់ស្នងការដ្ឋាននគរបាលខេត្តព្រះវិហារ ដើម្បីសួរនាំ នឹងចងក្រងសំណុំរឿងបញ្ជូនទៅកាន់សាលាដំបូងខេត្តព្រះវិហារ ចាត់ការបន្ត តាមនិតិពិធីច្បាប់ ៕