ដោយយោងតាមប្រភពព័ត៌មានពីសំណាក់ពលរដ្ឋដែលតែងតែធ្វើដំណើរឆ្លងកាត់ និងពលរដ្ឋរស់នៅក្នុងតំបន់ធ្វើការរិះគន់ទៅលើ អាជ្ញាធរឃុំ ស្រុក និងមន្ត្រីជំនាញពាក់ពន្ធ័ថា បានអនុញ្ញតហើយធ្វើការចេញជាបណ្ណ័កម្មសិទ្ធគ្រប់គ្រងឲ្យទៅឯកជនក្នុងលក្ខណៈ ឃុបឃិតគ្នាស្រូបយកផលប្រយោជន៍ធ្វើមានធ្វើបាននោះ ត្រូវបានពលរដ្ឋចាប់ផ្តើមផ្តល់ព័ត៌មានលាតត្រដាង នូវទង្វើពុករលួយជា លក្ខណៈប្រព័ន្ធជូនថ្នាក់ដឹកនាំបានជ្រាប ។

ថ្មីៗនេះពលរដ្ឋរស់នៅ ឃុំអន្លង់វែង ស្រុអន្លង់វែង ប្រាប់ឲ្យដឹងថា អំពើពុករលួយមួយបានកើតឡើង ដោយរូបលោក ជន រះ មេឃុំ លំទង និងលោក គឹម គាវិន ប្រធានការិយាល័យភូមិបាលស្រុកអន្លង់វែង បានឃុបឃិតគ្នាចេញប្លង់នៅលើដីផ្លូវសាធារណៈមួយ ដើម្បីឲ្យបុគ្គលអ្នកមានលុយមានសិទ្ធិសាងសង់លំនៅដ្ឋាន បែបសំណង់រឹងយ៉ាងធំសម្បើម នៅលើដីចំណីផ្លូវសាធារណៈជាដីរដ្ឋ ទាំងមានការហួសចិត្តហួសថ្លើមថា ចេះអនុញ្ញតទៅកើត ។

ប្រភពពីពលរដ្ឋបានឲ្យដឹងថា ជនរងគ្រោះម្នាក់ឈ្មោះ ឡាក់ វ៉េង បានទិញដីមួយកន្លែងទំហំ៤.៥៦០ម៉ែត្រការ៉េ ដែលមានទីតាំង ស្ថិតនៅ ភូមិទួលទ្រាស ឃុំលំទង ស្រុកអន្លង់វែង ខេត្តឧត្តរមានជ័យ នៅក្នុងឆ្នាំ២០០៦ ដោយមានលោកមេភូមិ ទួលទ្រាស លោក ជន រះ មេឃុំលំទង និងរដ្ឋអាជ្ញាធរស្រុក ព្រមទាំងលោក គឹម គាវិន ដែលជាប្រធានភូមិបាលស្រុកអន្លង់វែង ចេញប្លង់ បញ្ជាក់ឲ្យផងដែរ ។

នៅក្នុងពេលដែលទិញរួច និងបំពេញបែបបទច្បាប់ហើយ ផ្ទៃដីនៅខាងមុខដីរបស់ឈ្មោះ ឡាក់ វ៉េង គឺជាផ្លូវសាធារណៈ ហើយ ក្រោយមកនៅឆ្នាំ២០០៧ អាជ្ញាធរខេត្ត បានធ្វើផ្លូវថ្មីជាផ្លូវកៅស៊ូ ស្របទៅក្បែរនឹងផ្លូវចាស់នោះ ដោយកំណត់ទុកផ្លូវចាស់ធ្វើជាដី ចំណីផ្លូវសាធារណៈ ទើបឈ្មោះ ឡាក់ វ៉េង ពុំបានធ្វើរបងឲ្យដល់ចិញ្ចើមផ្លូវថ្មីដែលជាផ្លូវកៅស៊ូនោះ ព្រោះគិតថា ក្រែងរដ្ឋត្រូវការ ជីកប្រឡាយទឹកផ្សេងៗ ឬជួសជុលផ្លូវពេលក្រោយ ផ្ទុយទៅវិញអ្វីដែលឈ្មោះ ឡាក់ វ៉េង មិននឹកស្មានដល់នោះ គឺផ្លូវចាស់ដែលគេ ចាត់ទុកជាដីចំណីផ្លូវថ្មីនោះ បែរជានៅឆ្នាំ២០១៣ អាជ្ញាធរឃុំ ដែលមានរូបលោក ជន រះ ជាមេឃុំលំទង និងលោក គឹម គាវិន ប្រធានភូមិបាលស្រុកអន្លុងវែង ចេញប្លង់ឲ្យទៅឈ្មោះ ស៊ាម ម៉េងស៊ាង ដែលជាបុគ្គលមានលុយធ្វើជាកម្មសិទ្ធិបានយ៉ាងរំភើយ។

ក្រោយពីលោក ស៊ាម ម៉េងស៊ាង ត្រូវបានអាជ្ញាធរឃុំនិង ប្រធានភូមិបាលស្រុកអន្លង់វែង ចេញប្លង់ឲ្យរួចហើយនោះ បុគ្គលលោក ស៊ាម ម៉េងស៊ាង បានសាងសង់ផ្ទះរបស់ខ្លួន នៅលើដីចំណីផ្លូវសាធារណៈនេះ បែបសំណង់រឹងយ៉ាងសម្បើម បាំងពីមុខដីលំនៅ ដ្ឋានរបស់ឈ្មោះ ឡាក់ វ៉េង តែម្តង ជាហេតុធ្វើឲ្យជនរងគ្រោះ មានការឈឺចាប់និងទាមទាភាពយុត្តិធម៌ ព្រមទាំងដំណោះស្រាយ ផង។

ជាច្រើនឆ្នាំកន្លងមកហើយ ដែលជនរងគ្រោះ ឡាក់ វ៉េង ម្ចាស់ដីដែលបានទិញក្នុងឆ្នាំ២០០៦ បានប្តឹងទាមទាសុំឲ្យថ្នាក់ដឹកនាំ ជួយផ្តល់យុត្តិធម៌ដល់ខ្លួន ព្រោះតែដីផ្លូវសាធារណៈបែរជាក្លាយទៅជាកម្មសិទ្ធិឯកជន ហើយសង់ផ្ទះប្រភេទសំណង់រឹង ចំបាំង ពីមុខផ្ទះរបស់លោក បិទសិទ្ធិសេរីភាពក្នុងការធ្វើដំណើរចេញចូលរបស់លោកយ៉ាងខ្លាំង ប៉ុន្តែអស់រយៈ ពេលជាច្រើនឆ្នាំមកនេះ រូបគាត់ ពុំបានលទ្ធផលអ្វីក្រៅតែពីដេករំពឹងផ្កាយលើមេឃតែប៉ុណ្ណោះ ។

ប្រជាពលរដ្ឋជាច្រើននៅក្នុងស្រុកអន្លង់វែង បានលើកឡើងថា មិនគួរទេ ដីផ្លូវសាធារណៈសោះ បែរជាអាជឍញាធរនិងជំនាញ
ភូមិបាល ចេញប្លង់ឲ្យជាកម្មសិទ្ធិឯកជន ហើយព្រមទាំងសង់សំណង់រឹងជាផ្ទះដ៏ធំសម្បើមបែបនេះបាននោះសោះ ហើយបើតែ យ៉ាងនឹង តើច្បាប់ភូមិបាលរបស់កម្ពុជា លោកគិតបែបម៉េច ឬមួយថា ឲ្យតែអ្នកមានលុយមានខ្នងបង្អែកជាអ្នកធំ អាចសុំឲ្យ ចេញប្លង់ ហើយធ្វើផ្ទះដ៏សម្បើមនៅលើដីចំណីផ្លូវ សាធារណៈបានបែបនេះហ្ន៎ ?

ប្រជាពលរដ្ឋ សូមសំណូមពរដល់លោក ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ សូមមេត្តាជួយមាន ចំណាត់ការជួយឲ្យមន្ត្រីជំនាញចុះពិនិត្យមើពីផលប៉ះពាល់ និងផ្តល់យុត្តិធម៌ដល់ភាគីជនរងគ្រោះផង ព្រោះថា ក្នុងករណីខាង លើនេះ ជនរងគ្រោះក៏ធ្លាប់បានដាក់ពាក្យបណ្តឹងសុំឲ្យអភិបាលខេត្តឧត្តរមានជ័យ ជួយ គឺមានរយៈពេល៦ឆ្នាំមកហើយ ។

ករណីនេះអង្គភាពទូរទស្សន៍ ខ្លាប៉ុស្តិ មិនអាចសុំការបំភ្លឺពីលោកជន រះមេឃុំ លំទង និងលោក គឹម គាវិន បានទេពីម្សិល មិញហើយអង្គភាពយើងរង់ចាំ ការបកស្រាយជានិច្ចពីសំណាក់សាម៉ីអង្គភាពពាក់ពន្ធ័ ៕