យោងតាមប្រភពព័ត៌មានដែល អង្គភាពខ្លាប៉ុស្តិ៍ ទទួលបានបានឲ្យដឹងថា កាលពីពេលថ្មីៗនេះ មនុស្សចំនួន៥នាក់ត្រូវបាន នគរបាលប៉ុស្តិ៍ស្រែព្រះ នាំយកទៅប្រគល់ឲ្យមន្ត្រីបរិស្ថានដែនជម្រកកែវសីម៉ា ដោយចោទប្រកាន់ថា បានកាប់ទន្ទ្រានយកដីព្រៃដោយខុសច្បាប់ ប៉ុន្តែបើតាមការបញ្ជាក់ពីក្រុមគ្រួសារពួកគាត់ បានអះអាងថា ពលរដ្ឋទាំង៥រូប គឺមិនបានប្រើសម្ភារៈចូលទៅកាប់ព្រៃ ដូចការចោទប្រកាន់របស់មន្ត្រីនគរបាលប៉ុស្តិ៍ឡើយ ។

ប្រភពព័ត៌មានបានបន្តថា កាលថ្ងៃទី២៦ ខែធ្នូ ២០១៩ ប្រជាពលរដ្ឋពួកគាត់បាននាំគ្នាទៅសំអាតស្មៅដំឡូង ដោយមានអ្នកបោចស្មៅ និងអ្នកខ្លះក៏យកកាំបិតទៅកាប់កូនឈើតូចៗ នៅជាប់ទៅនឹងដើមដំឡូង ក្នុងចំការនោះចេញ ស្រាប់តែម៉ោងប្រ
មាណ ២ និង៣០នាទីរសៀលថ្ងៃដដែលនេះ គេឃើញមានកម្លាំងនគរបាលប៉ុស្តិ៍រដ្ឋបាលស្រែព្រះ និងកម្លាំងប្រជាការពារភូមិ ដែលដឹកនាំដោយរូបលោក ស៊ុន វិបុល ដែលជាមេប៉ុស្តិ៍ បានចុះឡោមព័ទ្ធចាប់ពួកគាត់ទាំង០៥នាក់ បញ្ជូនចេញពីក្នុងចំការដំឡូង យកទៅកាន់កន្លែងមួយផ្សេងទៀត ដែលមានសភាពកាប់រំលំព្រៃឈើហើយនោះ បង្ខំឲ្យថតរូបភាពពួកគាត់នៅទីនោះដោយចោទប្រកាន់ថា ពួកគាត់ទាំង៥ បានកាប់ព្រៃដែនជម្រកសត្វ ដែលការពារដោយមន្ត្រីបរិស្ថាន ហើយក៏ចាប់បញ្ជូនពួកគាត់ ទៅកាន់ស្នាក់ការបរិស្ថានពូគង់ តែម្ដង ។

ក្រោយពេលដែលមានការសួរនាំពីមន្ត្រីបរិស្ថានដែនជម្រក មនុស្ស០៤នាក់ គឺត្រូវបានមន្ត្រីបរិស្ថានធ្វើការដោះលែងហើយ ដោយឡែកតែមនុស្សស្រីម្នាក់ ពុំបានដោះលែងនោះទេ គឺត្រូវបានបញ្ជូនខ្លួនចូលទីតាំងឃុំក្នុងពន្ធនាគារហើយនៅថ្ងៃអាទិត្យនេះ ។

នេះជារូបភាពដ៏ឈឺចាប់ថ្មីមួយ ដែលកើតឡើងនៅលើប្រជាពលរដ្ឋស្រុកកែវសីម៉ា ខេត្តរតនគិរី ក្រុមគ្រួសារស្ត្រីរងនូវការចោទ
ប្រកាន់បានលើកឡើងថា វាមិនយុត្តិធម៌ទេ សម្រាប់ពលរដ្ឋស្លូតត្រង់ ជាក់ស្តែងណាស់ថា ចោទប្រកាន់ពលរដ្ឋថា កាប់ទន្ទ្រានដីព្រៃ ប៉ុន្តែភាពជាក់ស្តែងនោះ គឺពលរដ្ឋមានត្រឹមតែកូនកាំបិតផ្គាក់សម្រាប់សំអាតស្មៅដីចំការប៉ុណ្ណោះ និយាយឲ្យចំ គឺគ្មានពូថៅ គ្មានរណា និងរណាយន្តណាមួយសោះ បែរជាបង្ខំឲ្យពួកគាត់ទៅឈរថតរូបជាមួយទីកន្លែងដ៏ទៃទៀត ហើយប្រឌិតរឿងធ្វើបាបពលរដ្ឋយ៉ាង នឹងតែម្តង ។

ជាក់ស្តែងណាស់ករណីដីព្រៃទាំងអស់នោះ ប្រសិនបើពលរដ្ឋបានធ្វើមែន ក៏គួរតែមន្ត្រីបរិស្ថានជាអ្នកចុះបង្ក្រាបដែរ ប៉ុន្តែអស់
លោកសមត្ថកិច្ចប៉ុស្តិ៍ និងប្រជាការពារភូមិ នាំគ្នាយកពលរដ្ឋទៅថតរូបជាមួយទីតាំងផ្សេង ដើម្បីចោទប្រកាន់ឲ្យពលរដ្ឋជាប់ពិរុទ្ធនោះ តើមានន័យថាម៉េចទៅ តើយុត្តិធម៌មានទេសម្រាប់រាស្ត្រទន់ខ្សោយ ។

សម្រាប់ព័ត៌មានដ៏ឈឺចាប់មួយនេះ ក្រុមគ្រួសារជនរងគ្រោះ ដែលរងការចោទប្រកាន់ លើកដៃសំពះដង្ហើយហៅ រកអ្នកមានចិត្តបុណ្យ និងសុំកិច្ចអន្តរាគមន៍ ពីប្រមុខដឹកនាំរដ្ឋាភិបាលគ្រប់លំដាប់ថ្នាក់ សូមមេត្តាជួយទុក្ខលំបាកពួកគាត់ផង ក្នុងរដូវ នេះ ជារដូវប្រមូលផលដំឡូងមី នៅក្នុងដីចំការអាស្រ័យផល បើគ្រាន់តែប្រមូលផលរបស់ខ្លួនក៏ខុសនោះ តើជីវិតពួកគាត់រស់នៅបន្តទៀតយ៉ាងម៉េចកើត ៕