សេចក្តីរាយការណ៍ពីប្រជាពលរដ្ឋបានឲ្យដឹងថា នៅរសៀលថ្ងៃទី០២ ខែកក្កដា ឆ្នាំ២០១៩ មានរថយន្តល្មើសដឹកឈើមួយបាំងកន្លះ ពណ៌ត្រេអុី ឆ្លងកាត់តាមរង្វង់មូលផ្លូវ៦០ រួចបើក កាត់តាមមុខមន្ទីរ ពេទ្យគន្ធបុប្ផាទៅដាក់ក្នុងឃ្លាំងកែច្នៃឈើដ៏ធំខាងក្រោយសារៈមន្ទីរ ខេត្តសៀមរាប ជាប់និងសណ្ឋាគារ សេនជូរី ។

សេចក្ដីរាយការណ៍បានបញ្ជាក់ថា កម្មករក៏បានជិះតាមរថយន្ត ដឹកឈើរបស់មេឈ្មួញជើងចាស់ឈ្មោះ រិក បានដឹកឈើគេចពន្ធកក្រើកឡើងវិញហើយ ។ ចំពោះទីតាំងកែច្នៃមួយកន្លែងនេះ ដំណើរការប្រមូលទិញឈើគេចពន្ធចូលអស់រយះពេលជិត២០ឆ្នាំហើយ គេតែងតែសង្កេតឃើញមានរថយន្តនិងរុឺម៉កដឹកឈើគ្រប់ប្រភេទចល័តចូលជាញឹកញាប់នោះ ត្រូបានគេដឹងតៗគ្នាថា ម្ចាស់ឃ្លាំងកែច្នៃឈើនេះ ជាអ្នកមានអំណាចថែមទៀតផង បានជាមានសន្តិសុខយាមកាមយ៉ាងតឹងរឹងបំផុតចាំបើកទ្វារឲ្យរថយន្ត ដឹកឈើចេញ-ចូល២៤ម៉ោង។

មហាជនកំពុងរង់ចាំមើលថា លោក ទៀ សីហា អភិបាលខេត្តសៀមរាប ចាត់វិធានការបែបណាទៅលើឃ្លាំងស្តុកឈើគេចពន្ធខ្នាតយក្សមួយនេះ សូមចាត់វិធានការបង្ក្រាបឱ្យដូចគ្នានឹងសណ្ឋាគារអង្គរអេរ៉ាដែលស្តុកឈើតាប់ៗប្រណីតគេចពន្ធនិងមានពន្ធជាង៥០០ម៉ែត្រ ត្រីគុណថ្មីៗនេះល្បីល្បាញកក្រើកពេញខេត្តសៀមរាបវិញហើយ។ ពាក់ព័ន្ធនិងបញ្ហានេះលោកនាយខណ្ឌរដ្ឋបាលព្រៃឈើ ខេត្តសៀមរាប ខណ្ខៈដែលលោកកំពុងតែដាំកូនឈើនោះ លោកបានប្រាប់ថា ចាំមើលលោកសួរកូនចៅរបស់លោកសិន ហើយលោកក៏បិទទូរសព្ទ័ទៅ ដោយមិនឃើញមានការឆ្លើយតបអ្វីទាំងអស់ ។

ប្រភពពីមេឈ្មួញបានឲ្យដឹងថា ពេលពួកគេដឹកឈើគេចពន្ធចូលមកក្រុងសៀមរាបម្តងៗ មុននិងចូលត្រូវតែរាយការណ៍ ជាមុនទៅជំនាញរដ្ឋបាលព្រៃឈើ.មន្ត្រីបរិស្ថាន.នគរបាលប្រឆាំងបទល្មើសសេដ្ឋកិច្ចខេត្ត និងក្រសួងប្រចាំក្នុងខេត្ត រួមជាមួយប៉េអឹម ទើបមេឈ្មួញអាចដឹកជញ្ជូនឈើចូលបានយ៉ាងរលូនដោយសេរី ៕