VOJ

ថ្ងៃសៅរ៍ ទី០៥ ខែកញ្ញា ឆ្នាំ២០៥០

គេហទំព័រ សម្រែកយុត្តិធម៌

ទំព័រដើម ព័ត៌មានជាតិ ព័ត៌មានអន្តរជាតិ ព័ត៌មានសន្តិសុខសង្គម ព័ត៌មានសិល្បះនិងកីឡា ព័ត៌មានស៊ើបអង្កេត

ព័ត៌មានថ្មីបំផុត

លោកអភិបាលខេត្ត ស្វាយ សំអ៊ាង និងលោកស្នងការនគរបាលខេត្ត ឡោ សុខា មើលរំលងល្បែងស៊ីសង នៅភូមិដាក់ដាំ ឃុំដាក់ដាំ ស្រុកអូររាំង ខេត្តមណ្ឌលគិរី ធ្វើឲ្យប្រជាពលរដ្ឋព្រួយបារម្ភពីបញ្ហាអសន្តិសុខសង្គម **|**

សេចក្តីរាយការណ៍ពីភូមិដាក់ដាំ ឃុំដាក់ដាំ ស្រុកអូររាំង ខេត្តមណ្ឌលគិរី បានឲ្យដឹងថា នៅក្នុងមូលដ្ឋានរបស់ពួកគាត់មានល្បែងស៊ីសងជ្រកក្រោមស្លាកកាស៊ីណូ ដំណើរការបានយ៉ាងរលូន ហើយអ្នកចូលលេងល្បែងភាគច្រើនលើសលប់ជាជនជាតិខ្មែរ ចំណែកជនជាតិយួនមានតិចតួចណាស់។

សេចក្តីរាយការណ៍បន្តថា នៅក្នុងកាស៊ីណូនោះមានបើកល្បែងបញ្ជល់មាន់និងអាប៉ោងទ្រង់ទ្រាយធំ ហើយជនជាតិខ្មែរដែលចូលលេងល្បែងស៊ីសងក្នុងកាស៊ីណូនោះចាញ់អស់លុយនិងទ្រព្យសម្បត្តិ រថយន្តឬម៉ូតូជាបន្តបន្ទាប់។

ចំណែកលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ក៏ដូចជាលោក ស្វាយ សំអ៊ាង អភិបាលខេត្តមណ្ឌលគិរី មិនព្រមចាត់វិធានការទៅលើម្ចាស់កាស៊ីណូដែលបើកឲ្យជនជាតិខ្មែរចូលលេងល្បែងស៊ីសងខុសពីការកំណត់នៅក្នុងច្បាប់នោះ។

តាមការបញ្ជាក់ពីពលរដ្ឋរស់នៅភូមិដាក់ដាំ ឃុំដាក់ដាំ ស្រុកអូររាំង បានឲ្យដឹងថា ចាប់តាំងពីកាស៊ីណូនេះបើកល្បែងបញ្ជល់មាន់ និងល្បែងអាប៉ោងទ្រង់ទ្រាយធំ គឺមានពលរដ្ឋក្នុងមូលដ្ឋានក៏ដូចជាអ្នកមកពីបណ្ដាខេត្តផ្សេងៗចូលលេងល្បែងយ៉ាងគគ្រឹកគគ្រេង! ផ្ដើមចេញពីល្បែងស៊ីសងនេះហើយទើបបច្ចុប្បន្ននៅក្នុងឃុំដាក់ដាំ និងបណ្ដាឃុំមួយចំនួនទៀតក្នុងស្រុកអូររាំង កើតមានបទល្មើសផ្សេងៗដូចជា អំពើចោរកម្មគួរឲ្យព្រួយបារម្ភធ្វើឲ្យប៉ះពាល់យ៉ាងខ្លាំងដល់សន្តិសុខសង្គម។

រហូតមកដល់ពេលនេះម្ចាស់កាស៊ីណូនៅភូមិដាក់ដាំ កំពុងបន្តបើកឲ្យពលរដ្ឋខ្មែរចូលលេងល្បែងយ៉ាងពេញបន្ទុកដោយមិនអនុវត្តន៍ឲ្យបានត្រឹមត្រូវទៅតាមច្បាប់នៃការបង្កើតកាស៊ីណូនោះទេ ចំណែកមន្ត្រីអាជ្ញាធរ និងសមត្ថកិច្ចក្នុងខេត្តមណ្ឌលគិរី នាំគ្នាសម្ងំស្ងាត់ឈឹង។

មជ្ឈដ្ឋាននានាបានលើកឡើងថា ក្នុងច្បាប់ដែលបង្កើតកាស៊ីណូមិនអនុញ្ញាតឲ្យជនជាតិខ្មែរចូលលេងល្បែងស៊ីសងនោះទេ គឺសម្រាប់តែជនបរទេសតែប៉ុណ្ណោះ ហើយម្ចាស់កាស៊ីណូណាបំពានច្បាប់ត្រូវប្រឈមនឹងការបិទអាជីវកម្មជាក់ជាមិនខាន។ ចំពោះកាស៊ីណូនៅភូមិដាក់ដាំ ឃុំដាក់ដាំ ស្រុកអូររាំង ខេត្តមណ្ឌលគិរី បែរជាបើកឲ្យពលរដ្ឋខ្មែរចូលលេងល្បែងស៊ីសងយ៉ាងគឃ្លើន ហើយអ្នកខ្លះចាញ់អស់លុយទ្រព្យសម្បត្តិ រថយន្ត-ម៉ូតូ ហើយឈានដល់កើតមានអំពើហិង្សាក្នុងគ្រួសារទៀតផង។

ដូច្នេះហើយទើបពលរដ្ឋក្នុងភូមិដាក់ដាំ ឃុំដាក់ដាំ ស្រុកអូររាំង អំពាវនាវយ៉ាងទទូចសុំឲ្យថ្នាក់ដឹកនាំក្រសួងមហាផ្ទៃ ក៏ដូចជានាយឧត្តមសេនីយ៍ នេត សាវឿន អគ្គស្នងការនគរបាលជាតិ ចាត់វិធានការបង្ក្រាបល្បែងស៊ីសងនៅក្នុងកាស៊ីណូនៅភូមិដាក់ដាំ ជាបន្ទាន់ ព្រោះលោក ស្វាយ សំអ៊ាង អភិបាលខេត្តមណ្ឌលគិរី និងលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី នាំគ្នាធ្វើមិនដឹងមិនឮការរាយការណ៍របស់ពលរដ្ឋក្នុងមូលដ្ឋាននោះទេ៕

ព័ត៌មានគួរចាប់អារម្មណ៍

លោក ឆេង សាវិន មេគយចល័តច្រកទ្វេភាគីព្រំដែនតំបន់ដូង ទំនិញគេចពន្ធទំនិញបង់ពន្ធមិនគ្រប់និងទំនិញខុសច្បាប់ចេញពីប្រទេសវៀតណាមចូលមកប្រទេសខ្មែរយ៉ាងគំហ៊ុកកំពុងត្រូវប៉ាន់និងទំនិញគេចពន្ធទំនិញបង់ពន្ធមិនគ្រប់!! 19/08/2026 (vojhotnews)