មន្ត្រីនៃអគ្គនាយកដ្ឋានកាំកុងត្រូល ក្នុងរាជធានីភ្នំពេញ នៃក្រសួងពាណិជ្ជកម្ម នៅរសៀលថ្ងៃទី១៨ ខែមីនា ឆ្នាំ២០២០ ម្សិលមិញនេះ បានបន្តចុះត្រួតពិនិត្យនៅតាមឱសថស្ថាននានា នៅក្បែរផ្សារអូឡាំពិក ដោយក្នុងប្រតិបត្តិ ការនោះ បានរឹបអូសអាកុលក្លែងក្លាយជាច្រើនលីត្រ ពីឱសថស្ថានមួយកន្លែង ខណៈកំពុងដាក់លក់នោះ។

លោកគង់ វុទ្ធី បានឲ្យដឹងថា បន្ទាប់ពីមានពាក្យបណ្តឹងរបស់ប្រជាពលរដ្ឋថា មានឱសថស្ថានមួយចំនួនបានលក់អាកុលក្លែងក្លាយ ហើយក្រុមការងាររបស់លោកបានធ្វើការឆែកឆេរ និងត្រួតពិនិត្យនៅបណ្តាឱសថស្ថានជាច្រើនកន្លែងនៅម្តុំផ្សារអូឡាំពិកនេះ ដោយប្រតិបត្តិការ នេះមានម្ចាស់ឱសថខ្លះបានសហការជាមួយក្រុមការងាររបស់លោក ហើយម្ចាស់ឱសថខ្លះមិនបានធ្វើកិច្ចសហការនោះទេ ។

ទាក់ទងនឹងប្រតិបត្តិការចុះត្រួតពិនិត្យនេះដែរ លោក គង់ វុទ្ធី បានឲ្យដឹងទៀតថា ក្រុមការងាររបស់លោកនឹងបន្តចុះត្រួតពិនិត្យ តាមឱសថស្ថានផ្សេងទៀតទាំងនៅក្នុងរាជធានី និងតាមបណ្តាខេត្តមួយនានានៅក្នុងប្រទេស ខណៈមានម្ចាស់ឱសថ ឬអាជីវករខ្លះ ឆ្លៀតឱកាស និយមបានដាក់លក់នូវអាកុល និងជែលលាងដៃក្លែងក្លាយ និងគ្មានប្រភពផលិតច្បាស់លាស់ ដើម្បីយកចំណេញច្រើន ដោយមិនគិតផលប៉ះពាល់ដល់អ្នកប្រើប្រាស់ ព្រោះតែសម្លឹង
ឃើញការភ័យខ្លាចការរីករាលដាលនូវមេរោគខូវិត១៩ របស់ពលរដ្ឋកម្ពុជាយើង ។

ទោះជាយ៉ាងណាក្តី លោក គង់ វុទ្ធី ក៏បានធ្វើការអំពាវនាវដល់បងប្អូនប្រជាពលរដ្ឋខ្មែរទាំងអស់ គប្បីទិញរបស់របរជាពិសេសអាកុល និងជែលលាងដៃ ឲ្យមានស្លាក់សញ្ញាសម្គាល់ត្រឹមត្រូវ និងមានប្រភពច្បាស់លាស់ ដើម្បីជៀសវាងរបស់ក្លែងក្លាយ និងគ្មានគុណភាព ដែលជាហានីភ័យបណ្ដាលឲ្យប៉ះពាល់ដល់សុខភាពរបស់យើង នៅ ពេលប្រើប្រាស់ ៕