សកម្មភាពកណ្ដៀរនៃការដឹកជញ្ជូនឈើអនាធិបតេយ្យស្រុករវាងខេត្តព្រះវិហារនៅតែបន្តដូចភ្លៀងរលឹម

១៥.១០.២០២២
ខេត្តព្រះវិហារ: សកម្មភាពដឹកជញ្ជូនឈើយ៉ាងរលូនចេញពីតំបន់ភូមិសាស្ត្រព្រំប្រទល់ស្រុកសណ្ដាន់ និងចេញពីក្រុមហ៊ុនព្រៃបារាំងឆ្លងកាត់តាមភូមិសាស្ត្រ ភូមិស្រែធំ ចូលមកទីរួមស្រុករវាង ក្នុងខេត្តព្រះវិហារ និងយកមកលក់បន្ត អោយសំណាក់ឈ្មួញមួយចំនួនទៀតដើម្បីធ្វើការដឹកជញ្ជូនបន្តតាមរយៈរថយន្តសាំយ៉ុង។
ទោះបីជាយ៉ាងណាក្តី អាជ្ញាធរ ឬមន្ត្រីពាក់ព័ន្ធ និងមន្ត្រីមានជំនាញ នៅតែធ្វើព្រងើយកន្តើយ មិនមានវិធានការបង្ក្រាបចំពោះរថយន្តសាំយុង និង គោយន្តកន្ត្រៃ ដែលបានប្រមូលទិញតាមផ្ទះ ពីភូមិសាស្ត្រ ភូមិស្រែធំ និងភូមិបុះពៃ ដើម្បីលក់បន្តទៅកាន់ខេត្តកំពង់ធំបានដោយរលូនសោះ។
ទំនោរបែបនេះ ប្រហែលជាមន្ត្រីមានសមត្ថកិច្ចបានទទួលលាភសក្ការៈ ឬបានសើមមាត់សើម ក ខ្លះហើយមើលទៅ?ទើបបានជាបណ្ដែតបណ្ដោយ ឲ្យឈ្មួញកណ្ដៀរធ្វើសារាចរណ៍ យ៉ាងអនាធិបតេយ្យ(ដូចសុភាសិតមួយពោលថា: កន្ទេលធំ បន្លំដេក)។
សូមបញ្ជាក់ផងដែលថា: ចំពោះការដឹកជញ្ជូនឈើ ចេញពីភូមិសាស្ត្រស្រុកសណ្ដាន់ និងចេញ ពីតំបន់ព្រៃបារាំង នៅតែបន្តសកម្មភាពហូរហែចូលមកទីរួមស្រុករវាង ក្នុងខេត្តព្រះវិហារយ៉ាងអនាធិបតេយ្យ។
ម្យ៉ាងទៀតសោត មហាជនរងចាំមើលផងដែលថា: អាជ្ញាធរមូលដ្ឋាន ឬសមត្ថកិច្ចមន្ត្រីមានជំនាញ និង មានវិធានការចំពោះការដឹកជញ្ជូនឈើយ៉ាងអនាធិបតេយ្យខាងលើនេះបានដោយរបៀបណា?
អង្គភាព V.O.J HOTNEWSរងចាំការបកស្រាយគ្រប់សាមីអង្គរៀងរាល់ម៉ោងធ្វើការ៕
ដោយ: ចាន់ ហាត PVH