កំពង់ធំ ÷  ថ្មីៗនេះ ជុំវិញករណី បុគ្គល  ឈ្មោះ ស៊ាង លូ បានចាក់ដីរំលោភយកដីចំណីបឹង ឬ ប្រឡាយសាធារណៈ តាមតែអំពើចិត្ត នៅចំណុច ភូមិខោស ឃុំទំរីង  ស្រុកសណ្តាន់  ខេត្តកំពង់ធំ  ។  មហាជនដាក់ការសង្ស័យថា  ហេតុអ្វីរដ្ឋបាលស្រុកសណ្តាន់ បានត្រឹមតែចេញសេចក្តីបំភ្លឺមួយច្បាប់  តែមិនមានការអនុវត្តច្បាប់ ហើយមន្ត្រីជំនាញពាក់ព័ន្ធទាំងអស់ បែរជាស្ងាត់ដូចចោរលូចសេះទៅវិញ  ។

   ប្រភពជាច្រើនបានអោយដឹងថា ÷  ទំតាំងដីដែលបុគ្គល ឈ្មោះ ស៊ាង លូ  បានកំពុងចាក់រំលោភបំពានយកធ្វើជាកម្មសិទ្ធនោះ គ្មាន ប្លង់  បង្កាន់ដៃ  ឬ វិញ្ញាបនប័ត្រសំគាល់ជាម្ចាស់អចលនវត្ថុនោះទេ  ។

   ដោយឡែបុគ្គល់ឈ្មោះ ស៊ាង លូ បានបន្តសកម្មភាពចាក់ដី រំលោភយកដីចំណីបឹង ឬ ប្រឡាយ  សាធារណៈខាងលើយ៉ាងរំភើយ  និងមិនញញើតនិងច្បាប់ និងសេចក្តីបំភ្លឺរបស់រដ្ឋបាលស្រុកសណ្តាន់បន្តិចទាល់តែសោះ។
សុំបញ្ជាក់ថា ការចាក់ដីរំលោភយកខាងលើនេះ តាំងពីកំឡុងដើមខែមិថុនា  ឆ្នាំ២០២៦ មករហូតមកដល់ថ្ងៃទី ២១ ទើបពលរដ្ឋបានរាយការណ៍ មកក្រុមអ្នកសារព័ត៌មាន។ ក្រោយទទូលបានព័ត៌មាននេះ  អ្នកសារព័ត៌មានយើងខ្ញុំ ក៏បានចុះទៅដល់ទីតាំងដែលកំពុងធ្វើសកម្មភាព  ក៏ឃើញមានគ្រឿងចក្រប្រភេទអាប៊ូល ១គ្រឿង និង ឡានដឹកដីជាច្រើនគ្រឿង  កំពុងដឹកដីចាក់ និង ឈូសឆាយទីតាំងខាងលើតែម្តង ។ ស្របពេលនោះដែរ ក៏ឃើញវត្តមានរបស់លោក សូ សុវណ្ណ មេឃុំទំរីង ក៏បានចុះទៅហាមឃាត់ គ្រឿងចក្រទាំងនោះមិនអោយចាក់លើចំណុចដីដែលគ្មានប្លង់ ដីចំណីបឹង ឬ ប្រឡាយសាធារណៈ ។ ក្នុងនោះក៏ឃើញបុគ្គលម្នាក់ ពាក់មួកក្រណាត់ពណ៍ខ្មៅ រុំមុខជិត  ដែលត្រូវបានគេស្គាល់ថា ឈ្មោះ ស៊ាង លូ  រូមទាំងបក្សពួក ចំនួន ៣ ទៅ ៤ នាក់ទៀត បានចេញមកថតលោកមេឃុំ  ដែលកំពុងហាមឃាត់ ព្រមទាំង ថតអ្នកសារព័ត៌មាន ដែលកំពុងចុះយកព័ត៍ និងប្រមូលព័ត៌មានតាមវិជ្ជាជីវៈ តែទោះជាយ៉ាងណា គ្រឿងចក្រទាំងអស់នោះ  ពុំបានផ្អាក់សកម្មភាពឡើយ ។ 
   ចំពោះករណីខាងនេះ រដ្ឋបាលស្រុកសណ្តាន់ បានចេញសេចក្តីបំភ្លឺមួយច្បាប់ ចុះថ្ងៃទី ២១ ខែមិថុនា ឆ្នាំ ២០២៦ ដែលមានខ្លឹមសារថា ÷
១.ករណីពលរដ្ឋចាក់ដីលើចំណីអូរ រដ្ឋបាលស្រុក និង អនុវត្តតាមផ្លូវច្បាប់។ ទីតាំងដែលបានកំពុងចាក់ដី និងជុំវិញទីតាំងចាក់ដីស្ថិតនៅភូមិខោស ឃុំទំរីង ស្រុកសណ្តាន់ ខេត្តកំពង់ធំ មិនទាន់មានវិញ្ញាបនប័ត្រសំគាល់ម្ចាស់អចលនវត្ថុនៅឡើយទេ ។
២. ករណីទឹកហូរកាត់ផ្លូវបណ្តាលអោយប្រជាពលរដ្ឋពិបាក់ធ្ចើដំណើរ  មូលហេតុមកពីស្ទះលូ ចំនួន២ទីតាំង (ទំហំលូតូច និងមានសម្រាមកកស្ទះច្រើន) តែត្រូវបានអជ្ញាធរឃុំ និង បងប្អូនប្រជាពលរដ្ឋសហការគ្នាស្តារួចរាល់ហើយ ។
៣.រដ្ឋបាលឃុំឃុំទំរីង មានគម្រោងជួសជុលលូ ទាំង២ទីតាំងនេះរូចហើយ ដោយពង្រីកទំហំលូអោយធំជាងមុនផងដែរ ។
   ក្រោយឃើញសេចក្តីបំភ្លឺរបស់រដ្ឋបាលស្រុកសណ្តាន់ ពលរដ្ឋមានការ សារទរជាខ្លាំង តែពលរដ្ធមួយចំនួនទៀត ក៏មានការខកចិត្តទៅវិញដែរ  ដោយបុគ្គលឈ្មោះ ស៊ាង លូ មិនបានផ្អាក់សកម្មភាពចាក់ឈូសឆាយ លើដីចំណីបឹង ឬ ប្រឡាយសាធារណៈនោះទេ ! គឺនៅតែបន្តសកម្មភាពជាបន្តបន្ទាប់  ។ 

   កត្តាទាំងនេះ ធ្វើអោយមហាជនដាក់ការសង្ស័យថា÷ កន្ទេលធំបន្លំដេក ឬបុគ្គលឈ្មោះ ស៊ាង លូ មានខ្សែ ឬខ្នងធំ នៅក្រោយខ្នងហើយ  ?ទើបមិនរអា ញញើតនិងច្បាប់បន្តិចទាល់តែសោះ។
   បើតាមការជជែក ពិគ្រោះយោបល់ដេញដោលគ្នា តាមតុកាហ្វេ  បានលើកឡើងស្រដៀងៗគ្នាថា ÷ ករណីដែលបុគ្គល ស៊ាង លូ ហ៊ានធ្វើតាមតែអំពើចិត្តដូច្នេះ គឺប្រហែលមកពី លោក ស៉ិន វណ្ណវុឌ្ឍ អភិបាលស្រុកសណ្តាន់  អសមត្ថភាព ឬគ្រាប់ចេញសេចក្តីបំភ្លឺដើម្បីបន្លំភ្នែកមហាជន និងការបង្វែរស្ថានការ ជាលេស ដើម្បីទុកឱកាសសម្រាប់បុគ្គល ស៊ាង លូ បន្តសកម្មភាពតែប៉ុណ្ណោះ    ។ 

   គូសបញ្ជាក់ដែរថា ប្រជាពលរដ្ឋដែលជាជនរងគ្រោះ បានទទូចស្នើសុំ ដល់មន្រ្តីជំនាញពាក់ព័ន្ធ គ្រប់លំដាប់ថ្នាក់ ជាពិសេស  ឯកឧត្តម  នួន  ផារ័ត្ន  អភិបាល នៃគណៈអភិបាលខេត្តកំពង់ធំ  មេត្តាចាត់មន្រ្តីជំនាញ ដើម្បីចុះអនុវត្តច្បាប់អោយបានតឹងរឹងអោយមាន តម្លាភាព អោយបានឆាប់រហ័ស  និងជួយផ្តល់យុត្តិធម៌  ចំពោះករណីខាងលើនេះផង។

   ​បើយោងតាមច្បាប់ភូមិបាល ឆ្នាំ២០០១នៃព្រះរាជាណាចក្រកម្ពុជា (ជាពិសេសមាត្រា ១៥) រាល់ដីធ្លីដែលជាទ្រព្យសម្បត្តិសាធារណៈការចាក់ដីលប់ដោយគ្មានការអនុញ្ញាត  ត្រូវបានចាត់ទុកជាអំពើខុសច្បាប់ (ការរំលោភបំពានលើដីរដ្ឋ) ដែលត្រូវប្រឈមមុខនឹងវិធានការរដ្ឋបាល (តម្រូវឱ្យកាយដីចេញវិញ និងស្តារដូចដើម) ឬទោសទណ្ឌតាមច្បាប់ស្តីពីភូមិបាល និងច្បាប់បរិស្ថាន។

   អង្គភាពយើងខ្ញុំ និងបន្តផ្សព្វផ្សាយជូនដល់មហាជន ក៏ដូចជាអ្នកតាមដានបណ្តាញសង្គមមួយចំនួនបន្តទៀត ក្នុងករណីនេះមានការវិវត្តន៍ ឬប្រែប្រូលយ៉ាងណានោះ   អង្គភាពរបស់យើងខ្ញុំ រង់ចាំទទូលការបកស្រាយ និងបំភ្លឺ ពីគ្រប់សាមីអង្គដែលពាក់ព័ន្ធ រៀងរាល់ម៉ោងធ្វើការ  ៕