កំពង់ធំ៖ ដើម្បីចូលរួមលើកទឹកចិត្ត និងគាំទ្រដល់កងកម្លាំងដែលត្រៀមចេញបំពេញបេសកកម្មការពារជាតិ និងបូរណភាពទឹកដី រដ្ឋបាលស្រុកសន្ទុក និងសាលាអនុគណស្រុក បានផ្តល់នូវគ្រឿងឧបភោគបរិភោគ ព្រមទាំងថវិកាមួយចំនួន ជូនដល់កម្លាំងទាហានផ្នែកសឹករងស្រុកសន្ទុក ចំនួន ៥នាក់ ដែលត្រូវចេញបំពេញបេសកកម្មតាមបន្ទាត់ព្រំដែន។

ការឧបត្ថម្ភនេះ ធ្វើឡើងក្នុងស្មារតីសាមគ្គីភាព និងការយកចិត្តទុកដាក់ចំពោះសុខទុក្ខរបស់កងកម្លាំងប្រដាប់អាវុធ ដែលបានលះបង់កម្លាំងកាយចិត្ត និងពេលវេលា ដើម្បីបំពេញភារកិច្ចការពារសន្តិសុខ សុវត្ថិភាព និងបូរណភាពទឹកដីជូនជាតិ និងប្រជាពលរដ្ឋ។

ក្នុងឱកាសនេះ ថ្នាក់ដឹកនាំរដ្ឋបាលស្រុក និងសាលាអនុគណស្រុក បានសម្តែងនូវការគាំទ្រ និងលើកទឹកចិត្តដល់កម្លាំងទាហានទាំង ៥នាក់ ឱ្យខិតខំបំពេញតួនាទី និងភារកិច្ចប្រកបដោយស្មារតីទទួលខុសត្រូវ គោរពវិន័យ និងអនុវត្តតាមបទបញ្ជារបស់ថ្នាក់ដឹកនាំ ដើម្បីធានាបាននូវប្រសិទ្ធភាពក្នុងការបំពេញបេសកកម្ម។

ជាមួយគ្នានេះ កងកម្លាំងទាហានដែលទទួលបេសកកម្ម ក៏បានថ្លែងអំណរគុណចំពោះរដ្ឋបាលស្រុកសន្ទុក និងសាលាអនុគណស្រុក ដែលបានយកចិត្តទុកដាក់ផ្តល់ការគាំទ្រ និងលើកទឹកចិត្តដល់ពួកគេ។ ការឧបត្ថម្ភនេះ ត្រូវបានចាត់ទុកថាជាកម្លាំងចិត្តដ៏មានតម្លៃ សម្រាប់ជំរុញឱ្យកងកម្លាំងបន្តបំពេញបេសកកម្មប្រកបដោយការប្តេជ្ញាចិត្ត និងស្មារតីស្នេហាជាតិ។

សកម្មភាពនេះ ក៏បានបង្ហាញពីការចូលរួម និងសាមគ្គីភាពរវាងអាជ្ញាធរមូលដ្ឋាន ព្រះសង្ឃ និងកងកម្លាំងប្រដាប់អាវុធ ក្នុងការគាំទ្រដល់កិច្ចការពារជាតិ និងការរក្សាសុខសន្តិភាពជូនប្រជាពលរដ្ឋ។